Դեմքի մաշկի հանկարծակի փոփոխությունը կարող է վկայել թաքնված խնդիրների մասին՝ սթրեսից և հոգնածությունից մինչև լուրջ պաթոլոգիաներ, ասել է դեղատների ցանցի մենեջեր Նիամ ՄըկՄիլանը:
Նա պատմել է The Sun-ին, թե ինչպես ճանաչել հիվանդությունները մաշկի գույնով:
Մասնագետի խոսքով՝ դեմքը կարող է կանաչավուն երանգ ձեռք բերել սրտխառնոցի, անհանգստության կամ վիրուսային վարակի պատճառով։ «Ավելի հազվադեպ, կապույտ-մոխրագույն-կանաչ երանգը ցույց է տալիս ցիանոզը, որը կապված է շնչառության կամ սրտի խնդիրների հետ»,- ավելացրել է նա:
«Մաշկի գունատությունը կարող է առաջանալ անեմիայի և հոգնածության, նաև գլխապտույտի և ուշագնացության պատճառով»,- նշել է ՄըկՄիլանը։
Հանկարծակի գունատությունը կարող է նաև լինել արյան ցածր ճնշման, ջրազրկման կամ շոկի արձագանք: Նման դեպքերում մասնագետը խորհուրդ է տվել դիմել բժշկի։
Դեղնավուն մաշկը, հատկապես աչքերի շուրջը, կարող է վկայել դեղնախտի մասին։ Նաև այս դեպքում մեզը մուգ երանգ է ստանում, իսկ կղանքը, ընդհակառակը, դառնում է բաց գույնի։ «Այս վիճակը պահանջում է անհապաղ բժշկական ուշադրություն»,- զգուշացրել է ՄըկՄիլանը:
Շոգի, ուժեղ հույզերի կամ գերբեռնվածության պատճառով դեմքը կարող է կարմրել։
Այնուամենայնիվ, եթե կարմրությունը երկար ժամանակ չի անհետանում, դա կարող է վկայել արյան բարձր ճնշման կամ ռոզացեայի մասին: Հանկարծակի կարմրությունը, հատկապես եթե ուղեկցվում է ավելացած քրտնարտադրությամբ և շնչահեղձությամբ, նախազգուշացնում է կարցինոիդ սինդրոմի մասին՝ ուռուցքների հորմոնալ ակտիվության հետևանքով առաջացած ախտանիշների համալիրի մասի։