Երեկ՝ հունվարի 7-ին, արտակարգ դեպք է տեղի ունեցել Արագածոտնի մարզում։ Երևան-Վանաձոր ավտոճանապարհի՝ Ջամշլու գյուղի վարչական տարածքում տեղի ունեցած ավտովթարի հետևանքով վիրավորումներ ստացած քաղաքացիներին օգնության հասած ՀՀ Ներքին գործերի նախարարության Ոստիկանության Պարեկային ծառայության Արագածոտնի մարզի գումարտակի 2-րդ վաշտի 2-րդ դասակի պարեկները՝ գումարտակի հրամանատար Մհեր Մելքոնյանի, գումարտակի հրամանատարի տեղակալ Ռոբերտ Ղազազյանի վաշտի հրամանատար Արմեն Տիգրանյանի և դասակի հրամանատար Տիգրան Սարգսյանի գլխավորությամբ, իրենք են հայտնվել արտակարգ իրավիճակում։
Ինչպես հայտնում է Shamshyan.com-ը, պարեկների ծառայողական ավտոմեքենան վնասվածքի պատճառով հայտնվել էր դաշտում և տևական ժամանակ չէր կարողանում դուրս գալ։ Պարեկներին օգնության են հասել քաղաքացիները և քարշակով դուրս են բերել ձնակույտից։ Իսկ մինչ այդ էլ վիրավորում ստացած քաղաքացիներին օգնություն են ցուցաբերել պարեկները ու Ծաղկահովիտ բժշկական կենտրոնի շտապօգնության բժիշկների հետ նրանց տեղափոխել հիվանդանոց։