Հայրական օջախիս ծուխն ինչու՞ մարեցիք... Դուք միայն մեկ լեզու գիտեք` բռնություն և կեղծիք, ձեր թայֆայական ոհմակներն են հարձակվել, խլել, ծեծել, կրակել ու սպանել...

Ո'չ, պարոն ծառուկյան, ՊՈԱԿ ի ֆեյք չեմ, բժիշկ եմ, շարքային քաղաքացի, մեկ տարի առաջ` ձեր որդու անձնական բանդայի կողմից սպանված Ջիվան Հարությունյանի հորաքույրը:
Եվ, դու'ք այսօր, պարոն, խնդրու՞մ եք, որ արդար գտնվեն և գոնե ձեր զավակին` ընտանիքի մյուս տղամարդուն, թողնեն տա՞նը....
Իսկապե՞ս մտածում եք, որ ընտանիքի բարեպաշտ զավակ եք դաստիարակել:
Իսկ եղբորս տունը ինչու՞ ամայացրեցիք, հայրական օջախիս ծուխն ինչու՞ մարեցիք...
Էլի փորձում էին ձեզ լռեցնե՞լ, թե՞ փորձում էին երկրին վնասել...
Այդ անմեղ արյունն ու Աստծու դատաստանին ուղղված մեր ամենօրյա հառաչանքն ու աղոթքներն են լսելի դարձել:
Այն սրտխառնոց առաջացնող ջերմեռանդությամբ, որով դուք և ձեր կուսակիցները նախանձելի վստահությամբ (կամ վախից դրդված) փորձում եք ամբիոնից պաշտպանել ձեր «հանցավոր անմեղությունը», քննադատում այլոց կյանքեր խլելը, ռեպրեսիաների ենթարկելը` մղձավանջի է նման: Հիմա էլ անձնվիրաբար մարտնչում եք հանուն ինչի՞` կեղծիքի ու ստորության...
Լու՞րջ եք ասում...
Տարիներ շարունակ դուք և ձեր մերձավորներն իրենց ավատական բդեշխություններում մարդկանց ունեզրկել եք, ստորացրել ու դաժանագույն ռեպրեսաների ենթարկել, ռեկետ արել այս պետությանը: Մինչ դուք պատսպարվել էիք «պարկեշտ» քաղաքական գործչի մորթու տակ` ձեր թայֆայական ոհմակներն են հարձակվել, խլել, ծեծել, կրակել ու սպանել...
Նման արժեհամակարգի շրջանակներում է ձևավորվել ու դաստիարակվել ձեր զավակը, նա ճանաչել է նպատակներին հասնելու միայն այդ ճանապարհները...